(نسخة منقحة بعد التصليح) سامي الجميل يطالب بانقلاب نبيه بري شيعيا، ورهان على فصل الحركة عن الحزب.. والا التقسيم.. خيط ب

(نسخة منقحة بعد التصليح)

سامي الجميل يطالب بانقلاب نبيه بري شيعيا، ورهان على فصل الحركة عن الحزب.. والا التقسيم..
خيط بغير هالمسلة..

لا يا شيخ سامي. ما حزرت هالمرة، ونادرا ما حزرت سابقا..
بنعرف بعضنا تقريبا ٢٥ سنة. العلاقات العائلية لجمتني ما رد عليك كل هالسنين. لكن اسمح لي رد عليك لاول مرة من ٢٥ سنة بنسمع معزوفتك.. لانك تخطيت خط احمر.. ونشرح لك بعض الحقائق اللي واضح ما بتعرفها، او بدك تتجاهلها..
طلعت البارحة على شاشة من الشاشات المسخرة لكم هالايام. وقسمت الشيعة بلبنان الى ٥٠٪ حزب، و٢٠٪ حركة و٣٠٪ مستقلين، وبوقاحة وثقة تطالب نبيه بري شخصيا بالانقلاب شيعيا..لتجنب التقسيم..
اولا. كفى تهدد تقسيم، لانو لو حصل حيلحقه ٥٠ تقسيم وراءه عندكم.. (غير تقسيمات بالبلد..).
بعدها بيصير بدك تقسيم بينك وبين نديم. (الحمدلله انو يمنى واعية وعاقلة..) وبينك وبين الاجنحة المختلفة اللي اقصيتها بالكتائب. وبينك وبين القوات. وبينك وبين التيار. وبينك وبين المردة. وبينك وبين الاحرار. وبينك وبين العائلات الكسروانية والمتنية، والمنشقين عن الكتائب وعن القوات. وبين وزغرتا وبشري والبترون والكورة.
جونية بيصير بدها تنفصل بجمهورية مستقلة عن امارة بكفيا، ومملكة معراب ومقاطعة دير القمر.. ونبلاء وامراء الساحل والجرد..
انت من عقلك عم تحكي وتطالب نبيه بري بانقلاب. واللي بيسمعك بيفكرك ديمقراطي سويدي..
الدم بعده ما نشف من معارككم مع بعض.. وما زلتم متمترسين. ايمتى التقيت الحكيم او جبران؟ كيفك انت وسليمان؟ او ايمتى التقى الحكيم وجبران او العائلات الساحلية والجبلية الكسروانية او المتنية..
ما تعلمتوا وما رح تتعلموا.. وكل مرة بتراهنوا غلط وبيدفع مسيحيين ابرياء الثمن. كم قتيل بالحرب الاهلية ماروني ومسيحي بين الموارنة وحدهم. لا، وبتضلوا خاطفين الاحزاب.. متلكم متل باقي الاحزاب اللبنانية اللي هي فعليا ملكيات عائلية.. وبيروحوا الابرياء.. وبتحكي بثقة رجل دولة وحزب ٣ نواب بعد ٨٠ سنة. وجاي تخاطب نبيه بري ينشق، وبيئة خابزها التاريخ ١٤٠٠ سنة..

هون باخذك على الساحة الشيعية.. وخذ هالحكي من علماني، انت صنفته من ال٣٠٪ المستقلين.
يا ريت اقدر اختزل لك الاخطاء بالطائفة... مجلدات ما بتكفي، اهمها التزاوج بين الايدلوجية الدينية مع الفساد... واللي مثلنا لذلك معارضين للثنائي..
لكن مع فرق مش بسيط ابدا. الشيعة بلبنان اللي" ما بيشبهوكم" ، عكس انتو، تعلموا الدروس من التجارب..
اولا اذا لاحظت بالحزب والحركة وعند المستقلين، ما في وراثة.. مش متل حزبك انت ورثت عن اخوك اللي كنت بدك كمان تقسيم بينك وبينه، اللي ورث عن ابوه، اللي ورث عن اخوه اللي كان منقسمم عنه، اللي ورث عن ابوه، حزب "ديمقراطي" عريق..
حتى الحركة وزبائنيتها، واللي بتشبه الاحزاب اللبنانية، بما فيها حزبك، حركة مختزلة بشخص، مش بعائلة، ولا اولاد ولا زوجة.. ما فيها وراثة، ولا تجيير.. بس يخلص عمر رئيسها، الله يطول بعمره، وياخذ من عمرنا ويعطيه، بتصير حركات..

بعدين الشيعة، يا عزيزي سامي، بما فيهم العلمانيين، اصلا بتربيتهم ما بيطعنوا بالظهر.. تعلموا ايضا من التجارب. لكن للأسف ما تعلموا انو ما حدا يطعنهم بظهرهم..
الشهيد بس يستشهد ما بيسال اهل الجنوب عن دينه... ابن القليعة متل ابن بنت جبيل.. بس نتبرع لسطوح بيروت داليا داغر وساندرا خلاط، ما بنشترط عليهم مذاهب التوزيع.. اسالهم..
انتو بتستغلوا حتى الموت. بتصنفوا الشهداء بدينهم.. لتزيدوا التفرقة.. وتثبتوا زعامة عائلية على حزب طائفي..
نرجع للشيعة.. خليني اقول لك اياها من اخرها.. ما رح تنجح صرختك لنبيه بري ولا للحركة.. مع كل تاريخكم انتو واياهم، وقابرين الشيخ زنكي سوا، لكن بهالموضوع خيط بغير مسلة..
واذا مراهن على علمانيين شيعة، فهم ايضا لا يطعنون في الظهر ولا يخونون المسيحيين والمسلمين ولا اللبنانيين، قبل ان يكونوا ويخونوا شيعة.. ما عندهم فرق بالانسانية، متل كتار مسيحيين امثال داليا وكل فريقها ويوسف حداد ورولا نصر وراشيل كرم وماغي فرح وريكارد كرم وغدي فرنسيس وروني الفا وريتا حايك واسكندر الدويهي وابونا الراعي وابونا المفكر الرئيس جورج حبيقة، والاف مؤلفة غيرهم لبنانيين من كل الطوائف..
ولا تراهن على كم مأجور صحافيين او "مثقفين". دولارات اكثر بيقلبوا البارودة..
حلمكم التقسيمي لن يرى النور لانو اللبنانيين اللي بدهم يعيشوا مع بعض اكثر بكثير منكم..

عزيزي سامي. بعد كلامك البارحة ذكرتني بزياراتك على لندن، ومرة بخطابك طالبت بنزع الجنسية.. يومها قلت لك "خيط بغير هالمسلة"..
وايضا سمعتك عم تفكر بالقضاء... رجاء اطلب من وزير عدلك يا ريت اقف انا واياك امام محكمة، بس فعلا تكون محكمة عدل، لا تشبه مجلس النواب الللي انت عضو فيه.. وما اسمع متلك من قاضي، "مادي اجرها من الشباك" وتضحك.

(غدا فيديو تفاصيل اكبر واشنع سرقة في التاريخ)

٥ حزيران ٢٠٢٦
حسن أحمد خليل