إعلامي مصري إسرائيل بتدفع الأحداث نحو كارثة محققة هتؤدي لخراب المنطقة العربية.. العالم صحي النهاردة على مصيبة جديدة، وهي إن
إعلامي مصري
إسرائيل بتدفع الأحداث نحو كارثة محققة هتؤدي لخراب المنطقة العربية.. العالم صحي النهاردة على مصيبة جديدة، وهي إن الطيران الإسرائيلي بالتنسيق مع إدارة ترامب، ضرب أهم منشأة غاز طبيعي عند إيران في حقل "بارس الجنوبي" ومنطقة "عسلويّة" بجوار منطقة بوشهر...
حقل الغاز ده بالذات مش مجرد مصنع ومنشأة نفطية، بل هو يعتبر الدينامو بتاع البلد حرفيًا، وهو اللي بيوفر نحو 40% من احتياجات الغاز وبينور بيوت ملايين الإيرانيين بحسب احصائيات بلومبرج... ودلوقتي كنز الطاقة ده اتحول لكتلة لهب ودخان مغطي السما...
بس المشكلة مش هنا...
المشكلة ان المتحدثين الرسميين من إسرائيل وأمريكا طلعوا بكل بجاحة يأكدوا إن الضربة دي مقصودة وبتنسيق كامل، وترامب كتب على "تروث سوشيال" إنه بياخد خطوات لإفلاس إيران وإنهاء شغل "رعاة الإرهاب" في المنطقة!
طيب تفتكر انت القصة هتقف على كده؟
يا ريت... بس للأسف مش هتتوقف هنا إطلاقًا... إيران المرة دي ماكتفتش بالتهديد المعتاد، وبحسب تقرير لأكسيوس (كل المصادر في الكومنتات ) طلعت "قائمة أهداف" معلنة وقالت إن منشآت الطاقة في السعودية وقطر والإمارات بقت أهداف مشروعة ومباشرة ليها...
وده برغم ان قطر بالفعل أدانت الضربة الإسرائيلية وقالت عنها انها بتهدد أمن الطاقة العالمي...
وبالفعل.. "أرامكو" السعودية بدأت فعلاً تخلي موظفيها من محطات "سامرف" والجبيل بحسب (بلومبرج)، والوضع في قطر والإمارات بالذات بقى كارثي، بعد ما المنشآت هناك بدأت تقفل أبوابها خوفًا من صواريخ الحرس الثوري، وحتى الطيران المدني متوقف والإمارات بتقول للناس يبعدوا عن المطارات...
واللي بيحصل ده كله للأسف الشديد هو بالضبط اللي إسرائيل وأمريكا عايزينه من أول الحرب...
الحقيقة إن المشهد بيقول إن في طرف مصلحته تكمن في إحراق المنطقة بالكامل.. طرف عايز يجر دول الخليج لحرب مباشرة مع إيران، ويخلي المسلمين (سنة وشيعة) ياكلوا في بعض ويخلصوا على موارد بعض، عشان إسرائيل تفضل هي القوة الوحيدة اللي واقفة على رجليها وسط الخراب ده... وحلم إسرائيل الكبرى للأسف كده هيبدأ يتنفذ بإيدينا احنا!
ضربة الغاز دي حتمًا هتدفع إيران إنها ترد بالمثل وتضرب آبار البترول والغاز في الخليج.. والنتيجة؟
برميل البترول نط لـ 110 دولار في ثواني، وأوروبا دلوقتي في أزمة كبيرة بسبب أسعار الغاز اللي زادت 9%، ومضيق هرمز ما زال مقفول مفيش سفن عارفة تعدي منه إلا في أضيق الحدود وبتنسيق مباشر مع إيران...
إحنا كده للأسف داخلين على مرحلة اللا عودة... مرحلة الدمار لأجل الدمار... العالم بقى مكان مرعب ومجنون، وإسرائيل ما زالت مصرة على تصعيد الحرب وبتقضي على أي وسيلة أو طريق لوقف إطلاق النار أو خفض التصعيد، وكانوا قاصدين جدًا إنهم يغتالوا لاريجاني، اللي هو كان الشخص الوحيد اللي ممكن يقبل يتناقش أو يتفاوض...
المنطقة كده بتتحول لساحة صراع عالمي على أهداف ونبوءات دينية خزعبلية، والضحية في وسط كل ده هتبقى الشعوب العربية اللي هتدفع تمن الفواتير دي كلها من اقتصادها وقوت يومها...
وهو ده المطلوب بالضبط.. إعادة الأمة العربية 100 سنة لورا، عشان تسيطر عليها اسرائيل... وإحنا ما زالنا مشغولين بالصراع والتلاسن مع بعض...
أتمنى من كل قلبي إن إيران تبص للمصلحة العامة وتغلب ما فيه مصلحة المسلمين، وما تضربش المنشآت النفطية في الخليج وتوجه كل ضرباتها نحو إسرائيل نفسها... بكل ما تمتلك من قوة.. لإن أمريكا واسرائيل مش فارق معاهم الخليج خالص، بل بالعكس بيدفعوا بكل خبث نحو المزيد من التدمير هناك، وهو ده البند التالي في الخطة...
ربنا يحلها من عنده، لإن الوضع كده محتاج معجزة إلهية ترجعنا تاني على الطريق الصح وتعرفنا العدو الحقيقي مين...
ان ما ينشر من اخبار ومقالات لا تعبر عن راي الموقع انما عن رأي كاتبها
